قلت هكلمكم البوست اللي فات عن موضوع كدة،،،في ناس ممكن تكون فهمتني غلطت من المقدمة اللي في البوست اللي فات،،،ولكن وفي سبيل توضيح الأمور إليكم البيان التالي:>
رحت المنصورة في يوم، لفت نظري النيل ونوادي النيل ومراكب النيل، لفت نظري الجو الجميل، جو يشجع على الرومانسية، فلا عجب إنك تلاقي البشر هناك اتنين اتنين، كل شاب مع بنت بتيخلوا مستقبلهم السعيد، أو تلاقي اتنين باين عليهم متجوزين،بيتكلموا في حاضرهم السعيد برضه، جو يشجع على الطعمية،
أيوة،،،فعندما يجتمع قلبان على هدوء النيل الجميل، تعلم أهمية الطعمية، أصل الهوا اللي رايح جاي على الاتنين الواقعين في حب بعض بيفتح النفس على الأكل، واحنا بلد اقتصادية، تلعب فيها الطعمية، اهم الأدوار الوطنية (إية إية)، فهي وجبة لذيذة وخفيفة على الجيب، يمكن محتاجة أمعاء فولاذية، مفيش مشكلة من الناحية دية (إية إية،،،
بجد أنا كنت بتابع الثنائيات الشبابية بنوع من أحلام اليقظة، بقول يا بخت من كان النيل جاره، أقضى بجد أحلى أيامه، دة كفاية بس تتابع المية وفيها المراكبية وقت العصرية (إية إية)،،،وكوباية الشاي في إيدك، أوف، شاي غير الشاي، مع كل رشفة (بق يعني) بتحس بحلاوة الطعمية في اللحظة دية (إية إية)، فلا عجب إن الرغبة الأولى لخريجي الثانوية هو الإلتحاق بمحلات الفول والطعمية،
هو الموضوع مش عن الطعمية، بس عن الرومانسية اللي بتفتح النفس على الحياة، وعلشان تعيش لازم تاكل، وعلشان ميتخربش بيتك بتشتري الطعمية،،، ياااااااااااه ع الرومانسية مع الطعمية (إية إية)